-उमाजी म. केळुसकर ⬑क्राईम स्टोरी ⬉
१६ एप्रिल २०२५ ची सकाळ नेहमीप्रमाणे शांत होती. कर्जत तालुक्यातील ठाकुरवाडी गावाजवळून मुंबई-पुणे रेल्वे मार्गावरून गाड्यांची नियमित वर्दळ सुरू होती. मात्र, सकाळी ठीक १० वाजता एका भयानक दृश्याने या शांततेला तडा गेला. रेल्वे रुळाच्या पूर्वेकडील बाजूला, किलोमीटर ११२/११६ च्या पोलजवळ एका गुलाबी रंगाची ट्रॉली बॅग बेवारसपणे पडलेली दिसली. कुतूहलाने जवळ गेलेल्या काही लोकांनी बॅग उघडली आणि त्यांना जे दिसले ते पाहून त्यांच्या पायाखालची जमीन सरकली. त्यांनी पोलिसांना बोलावले.
बॅगेजवळ एक तीव्र आणि असह्य वास हवेत पसरलेला होता. हवालदार कांबळे यांनी नाकाला रुमाल लावला. ते म्हणाले, "काय असावं यात?""बॅग उघडून बघावी लागेल," पोलीस नाईक शिंदे म्हणाले, पण त्यांच्या चेहऱ्यावर शंकेची छाया होती. त्यांनी अत्यंत सावधगिरीने बॅगेची चेन उघडली. आत डोकावताच त्यांना धक्काच बसला.
बॅग उघडल्यावर त्यांना एका अज्ञात महिलेचा मृतदेह दिसला. त्या बॅगेत तिचा मृतदेह अत्यंत निर्दयपणे कोंबलेला होता. तिचा चेहरा आणि डोके एका मोठ्या, पारदर्शक प्लास्टिकच्या पिशवीने अनेकवेळा गुंडाळले होते आणि टेपने चिकटवले होते. तिच्या नाकातून आणि कानातून काळसर रक्त साठले होते. हात आणि पाय नायलॉनच्या जाड दोरीने घट्ट बांधलेले होते, जणू काही ती जिवंत असताना प्रतिकार करत असावी. तिच्या गळ्यावर आणि डोक्यावर काही ठिकाणी मार लागल्याच्या खुणा दिसत होत्या. बॅगेच्या आतून येणारा कुबट वास आणि रक्ताचे डाग त्या भयानक कृत्याची साक्ष देत होते.
"अरे बापरे!" कांबळे यांच्या तोंडातून उद्गार निघाला.
घडलेली घटना तातडीने कर्जत पोलीस ठाण्यात कळवण्यात आली. लोणावळा दूरक्षेत्रातील महिला पोलीस हवालदार छाया चव्हाण यांनी तक्रार दाखल केली आणि अज्ञात आरोपींविरुद्ध गुन्हा नोंदवण्यात आला.
जिल्हा मुख्यालयातून पोलीस अधीक्षक सोमनाथ घार्गे यांचा तातडीचा आदेश आला, "या गुन्ह्याचे गांभीर्य ओळखा आणि आरोपींना लवकरात लवकर पकडा."
अपर पोलीस अधीक्षक अभिजीत शिवथरे आणि उपविभागीय पोलीस अधिकारी डी.डी. टेळे यांनी कर्जत आणि नेरळ पोलीस ठाण्यातील निवडक अधिकाऱ्यांची तपास पथके तयार केली.
"तुम्हाला सीसीटीव्ही फुटेज तपासायचे आहेत आणि मागील काही दिवसांतील बेपत्ता व्यक्तींच्या तक्रारींची छाननी करायची आहे," डी.डी. टेळे यांनी तपास पथकांना सूचना दिल्या. "प्रत्येक धागा पकडा आणि या महिलेला न्याय मिळवून द्या."
नेरळ पोलीस ठाण्याचे प्रभारी अधिकारी, सपोनि/शिवाजी ढवळे आणि त्यांचे पथक मुंबईच्या दिशेने रवाना झाले. कर्जतचे पोलीस निरीक्षक सुरेंद्र गरड यांनी आपल्या टीमसह परिसरातील सीसीटीव्ही फुटेज खंगळायला सुरुवात केली.
"शिंदे, स्टेशन आणि आसपासच्या सर्व कॅमेऱ्यांचे फुटेज काढा," गरड यांनी आदेश दिला. "आणि कांबळे, मागील आठवड्यात दाखल झालेल्या मिसिंगच्या तक्रारी तपासा."
दरम्यान, नेरळच्या पथकाने छत्रपती शिवाजी महाराज टर्मिनस, दादर, ठाणे, कल्याण, पनवेल आणि कर्जत रेल्वे स्थानकांवरील २०० ते २५० कॅमेऱ्यांचे फुटेज तपासले. लोकमान्य टिळक टर्मिनस येथे त्यांना एक संशयित व्यक्ती दिसली. फुटेजमध्ये तो एका गुलाबी रंगाची ट्रॉली बॅग फरफटत घेऊन जात होता. बॅग अगदी घटनास्थळी सापडलेल्या बॅगेसारखीच दिसत होती.
"सर, मला हे संशयास्पद वाटतंय," पोलीस उपनिरीक्षक फड म्हणाले. "बॅग ओढत चाललाय म्हणजे काहीतरी गडबड आहे."
"बरोबर आहे," ढवळे म्हणाले. "या माणसाचा माग काढा."
त्यांनी लोकमान्य टिळक टर्मिनसच्या प्लॅटफॉर्म क्रमांक ४ वरील वेगवेगळ्या अँगलच्या कॅमेऱ्यांचे फुटेज तपासले. त्यात त्यांना तोच संशयित माणूस एका महिलेसोबत १५ एप्रिलच्या रात्री १०-१७ वाजता मुंबई-कोइंबतूर एक्सप्रेसच्या कोच क्रमांक ए-१ मध्ये बसताना दिसला.
"आता आपल्याला या ट्रेनमधील प्रवाशांची माहिती काढावी लागेल," ढवळे म्हणाले आणि त्यांनी तात्काळ रेल्वे प्रशासनाच्या रिजर्वेशन विभागाकडे संपर्क साधला.
मुंबईतील मुख्य कार्यालयातून त्या बोगीतील ५२ प्रवाशांची यादी पोलिसांना मिळाली. या यादीत दोन नावे संशयास्पद वाटली, ज्यांनी रिजर्वेशनसाठी एकच मोबाईल नंबर दिला होता.
"या दोघांचे सीडीआर काढा," पोलीस निरीक्षक गरड यांनी सायबर सेलला सूचना दिली.
सीडीआर तपासल्यावर धक्कादायक माहिती समोर आली. दोघांनी कोइंबतूरपर्यंत तिकीट बुक केले होते, पण त्यांचे शेवटचे लोकेशन बेंगळूरु दाखवत होते.
"म्हणजे हे दोघे बेंगळूरुला उतरले," फड म्हणाले. "आणि त्यांच्याकडे बॅग नव्हती!"
"बरोबर," ढवळे म्हणाले. "आता आपल्याला बेंगळूरुला जावे लागेल."
नेरळचे तपास पथक तातडीने बेंगळूरुकडे रवाना झाले. त्यांनी केएसआर बेंगळूरु सिटी रेल्वे स्टेशनवरील सीसीटीव्ही फुटेज तपासले. १६ एप्रिलच्या रात्री ८:५६ वाजता ते दोघे एक्सप्रेसमधून उतरताना दिसले, पण त्यांच्या हातात ती गुलाबी बॅग नव्हती.
"बॅग कुठे गेली?" हवालदार केकाण यांनी प्रश्न विचारला.
"म्हणजे त्यांनी बॅग आणि मृतदेह वाटेतच कुठेतरी टाकून दिला," पोलीस नाईक बेद्रे म्हणाले.
आता पोलिसांना खात्री झाली की हेच दोघे आरोपी आहेत. त्यांनी तांत्रिक पुराव्यांच्या मदतीने त्या दोघांच्या बेंगळूरुमधील ठिकाणाची माहिती काढली आणि त्यांना ताब्यात घेतले.
व्ही. विजयकुमार व्यंकटेश आणि टी. यशस्वीनी राजा ताटीकोलु यांना कर्जत पोलीस स्टेशनमध्ये आणण्यात आले. सुरुवातीला त्यांनी गुन्हा नाकारण्याचा प्रयत्न केला, पण जेव्हा पोलिसांनी सीसीटीव्ही फुटेज आणि सीडीआरचे पुरावे दाखवले, तेव्हा ते जास्त वेळ टिकू शकले नाहीत.
"आम्ही... आम्हीच तिला मारलं," विजयकुमार हळू आवाजात म्हणाला.
"का?" पोलीस निरीक्षक गरड यांनी कठोरपणे विचारले.
"आमचं भांडण झालं होतं," यशस्वीनी म्हणाली. "ती खूप त्रास देत होती."
त्यांनी सांगितले की मृत महिला धनलक्ष्मी यारप्पा रेड्डी त्यांच्यासोबत असलेल्या अंतर्गत वादामुळे त्यांनी तिला मारले आणि पुरावा नष्ट करण्यासाठी तिचा मृतदेह बॅगेत टाकून रेल्वे रुळाजवळ फेकून दिला.
१० मे २०२५ ला, त्या दोघांनाही कर्जतच्या न्यायालयात हजर केले असता, न्यायालयाने त्यांना १६ मे २०२५ पर्यंत पोलीस कोठडी सुनावली आहे. पोलीस निरीक्षक सुरेंद्र गरड पुढील तपास करत आहेत, पण या दोन आरोपींच्या अटकेमुळे एका अज्ञात मृत्यूचे रहस्य उलगडले आणि पोलिसांच्या अथक प्रयत्नांना यश आले.
कोणत्याही टिप्पण्‍या नाहीत:
टिप्पणी पोस्ट करा